Tu Hi Tu Rahe Kalam Lyrics
Dil mein jigar mein aankh mein bas tu hi tu rahe
Is ke siwa na aur koi aarzu rahe
Mujh ko fana ki raah mein yun sarfaraz kar
Main, main na rahun mujh mein faqat tu hi tu rahe
Na karo juda khudara mujhe apne aastan se
Na mile ga phir sahara jo utha diya yahan se
Mujhe khak mein mila kar meri khak bhi urha de
Tere naam par mita hun mujhe kya gharaz nishan se
Bus tu hi tu rahe … faqat tu hi tu rahe
Agar gham tera gham hai to koi gham se reha kyun ho?
Jise hasil ho tera qurb woh tujh se juda kyun ho?
Tera jalwa jo hasti hai to phir qaid-e-nazar kaisi?
Meri hasti jo parda hai to woh bhi darmeyan kyun ho?
Faqat tu hi tu rahe … faqat tu hi tu rahe
Ye hasti o adam kyun ho, fana kyun ho, baqa kyun ho?
Tumhi tum ho to phir dil mein khayal-e-ma-siva kyun ho?
Faqat tu hi tu rahe … faqat tu hi tu rahe
Mita do shauq se aa kar mita do meri turbat ko
Jo tum par mar mita ho us ka itna bhi nishaan kyun ho?
Faqat tu hi tu rahe … faqat tu hi tu rahe
Bigaad kar banaaye ja, ubhaar kar mitaaye ja
Ke main tera charagh hun, jalaaye ja bujhaye ja
Tu hi tu rahe … faqat tu hi tu rahe
Masjiden lakhon baneen, sainkdon mandir bane
Ik tujhe paane ke liye chaar su hi ghar bane
Bus tu hi tu rahe … faqat tu hi tu rahe
Main, main na rahun mujh mein faqat tu hi tu rahe
Dil mein jigar mein aankh mein bus tu hi tu rahe
Meri namaz-e-ishq ko mairaj ho ataa
Meri namaz-e-ishq ... Han hai namaz-e-ishq
Yahi hai namaz-e-ishq … yahi hai namaz-e-ishq
Ay naseho na aur koi guftugu karo
Gar ho sake to chaak-e-gareban rafu karo
Phir jis tarah bhi chaho karo ham pe tabsira
Pahle hamari tarah se jeene ki khoo karo
Hoti nahin hai yunhi ada ye namaz-e-ishq
Yaan shart ye hai apne lahu se wudu karo
Yahi hai namaz-e-ishq … yahi hai namaz-e-ishq
Shikva hai kufr ahl-e-mohabbat ke vaste
Har ik jafa-e-yaar pe shukrana chahiye
Ye aastan-e-yar hai sehn-e-haram nahin
Jab rakh diya hai sir to uthana na chahiye
Logo namaz-e-ishq yahi hai Khuda gavah
Har dam tasavvur-e-ruḳh-e-janana chahiye
Yahi hai namaz-e-ishq … yahi hai namaz-e-ishq
Gata hai zarra zarra, teri shan mein tarana
Jahan par bhi tu ne chaha, wahin ruk gaya zamana
Sar-e-toor kyun main jaun bhala us ke dekhne ko?
Woh ayaan jagah jagah hai jo nazar ho arifana
Jo ho jazb jazb-e-kamil jo ho shauq valihana
To hai bandagi ko lazim na jabeen na astana
Ye hai namaz-e-ishq … yahi hai namaz-e-ishq
Mere paas hi rahe hain woh shuru-e-dastan se
Mujhe hosh hi na aya unhen dekhta kahan se?
Woh giraye jayen bijli mein isi ada ke sadqe
Keh koi to wasta hai unhain mere aashiyan se
Woh hareem-e-naaz mein hon ya hon bazm-e-butkada mein
Mein waheen pe sar jhuka loon wo pukaar len jahan se
Yeh hai namaz-e-ishq … Han hai namaz-e-ishq
Koi bhi dekhne walon mein hoshyar nahin
Nazar to aik hai jalwon ka kuch shumar nahin
Kitab-e-ishq ki tafseer mein likha dekha
Namaz hi nahin jis mein khayal-e-yaar nahin
Yahi hai namaz-e- … Yahi hai namaz-e-ishq
Hum ne yeh bandegi ka tariqa bana liya
Apne sanam ko yaad kiya sar jhuka liya
Yahi hai namaz-e- … Yahi hai namaz-e-ishq
Dagh-e-sujood teri jabeen par hua to kya!
Koi aisa sajda kar ke zameen par nishan rahe
Yahi hai namaz-e- … Yahi hai namaz-e-ishq
Qaayam hai kab namaz jo tu ru-ba-ru na ho?
Sajda kise karun jo nigahon mein tu na ho?
Meri namaz-e-ishq ko mairaj ho ataa
Aisi pila ke rooh meri ba-wuzu rahe
Ruswa na ho ghulam tera roz-e-hashr mein
Bas itna chahta hoon meri aabru rahe
Khushaa woh dil ke ho jis dil mein aarzu-e-Rasool (saww)
Khushaa woh aankh jo ho mehv-e-husn-e-roo-e-Rasool (saww)
Shagufta gulshan-e-Zahra (sa) ka har gul-e-tar hai
Kisi mein rang-e-Ali (as) aur kisi mein Bu-e-Rasool (saww)
Ajab tamasha ho maidan-e-hashr mein Bedam
Keh sab hon pesh-e-Khuda aur mein ru-ba-ru-e-Rasool (saww)
Bas itna chahta hoon meri aabru rahe
Dil Mein Jigar Mein Aankh Mein Bas Tu Hi Tu Rahe
Is ke siwa na aur koi aarzu rahe
